PROCEDURAT E APLIKIMIT, RAUNDI I DYTË
Në periudhën 15 – 17 Shtator, kryhet procesi i aplikimit online për raundin e dytë në Portalin U-Albania. Kanë të drejtë të aplikojnë, duke përzgjedhur deri në 10 (dhjetë) programe studimi, kandidatët, përfshirë edhe kandidatët nga Kosova, të cilët kanë plotësuar formularin A1/A1Z dhe rezultojnë kalues në provimet e maturës shtetërore, por që:
- a) nuk kanë arritur të aplikojnë në raundin e parë;
- b) kanë kryer procesin e aplikimit online në raundin e parë dhe nuk janë shpallur fitues;
- c) kanë kryer procesin e aplikimit online në raundin e parë dhe nuk kanë arritur të regjistrohen;
- d) janë çregjistruar pas përfundimit të raundit të parë.
Kandidatët, që nuk kanë aplikuar në raundin e parë, përpara aplikimit për zgjedhjen e preferencave në portalin e aplikimit universitar, kryejnë pagesën e tarifës së aplikimit në vlerën 2000 (dy mijë) lekë, në zyrat e Postës Shqiptare apo në bankat e nivelit të dytë, nëpërmjet faturës për arkëtim, të cilën e shkarkojnë në portalin U-Albania. Kandidatët që kanë aplikuar në raundin e parë dhe do të riaplikojnë në raundin e dytë, nuk duhet të kryejnë pagesën e tarifës së aplikimit për këtë raund. Periudha e kryerjes se pagesës, afati i dorëzimit të mandatit të pagesës, si dhe konfirmimi në portalin U-Albania nga sekretaritë e shkollave, është 29 Gusht – 14 Shtator.
Në datat 18-20 shtator 2023, IAL-të afishojnë dhe publikojnë listat e renditjes së kandidatëve, duke përdorur si element identifikimi vetëm ID-në e tyre, në mënyrë që të respektohen përcaktimet e kuadrit ligjor për mbrojtjen e të dhënave personale. Brenda datës 21 shtator 2023, IAL- të ngarkojnë një kopje elektronike të këtyre listave në portalin U-Albania.
Na ndiqni në Instagram: @matura.shteterore. Aty do të gjeni të rejat më të fundit rreth aplikimit dhe regjistrimit Universitar